బ్లేడ్ బ్యాచ్ దొంగ‌ల అరెస్టు

వన్‌టౌన్‌ కాళేశ్వరరావు మార్కెట్‌ వద్ద ఇద్దరు బ్లేడ్‌బ్యాచ్‌ సభ్యులు సీసీఎస్‌ పోలీసులు గురువారం అరెస్టు చేశారు. పాత రాజరాజేశ్వరీపేటకు చెందిన మొఘల్‌ నయ్యూమ్‌ (25), వై.ఎస్‌.ఆర్‌.కాలనీకి చెందిన పిల్లా భాస్కర్‌ (24)లు కాళేశ్వరరావు మార్కెట్‌ సమీపంలో పండ్ల వ్యాపారం చేస్తుంటారు. వ్యాపారంలో వచ్చిన డబ్బులతో జల్సాలు చేసే వారు. అయితే డబ్బులు సరిపోకపోవటంతో సులభంగా డబ్బులు సంపాదించాలనుకున్నారు. ఈ క్రమంలో ఒంటరిగా వెళుతున్న వారిపై దాడి చేసి వారి వద్ద డబ్బులు లాక్కుని జల్సాలు చేసేవారు. ఈ క్రమంలో ఏప్రిల్‌ 9న వినాయకుడి గుడి నుంచి మంగళగిరి వైపు నడిచి వెళుతున్న ఓ యువకుడిని బెదిరించి నగదు లాక్కునేందుకు ప్రయత్నించారు. అతను అడ్డుకోవటంతో ఆ యువకుడి వీపుపై కోసి డబ్బులు లాక్కున్నారు. 26న అర్ధరాత్రి సమయంలో కాళేశ్వరరావు మార్కెట్‌ వద్ద అనుమానాస్పదంగా తిరుగుతున్న వీరిద్దరినీ సీసీఎస్‌ పోలీసులు అరెస్టు చేశారు.