క్రికెట్ బెట్టింగ్ ముఠా అరెస్టు.. డ‌బ్బు, కార్లు స్వాధీనం

ఐపీఎల్‌ క్రికెట్‌ బెట్టింగ్‌కు పాల్పడుతున్న ముఠాను పోలీసులు మంగళవారం అరెస్టు చేసి వారి నుంచి రూ.1.13 లక్షల డ‌బ్బు, సెల్‌ఫోన్లు, రెండు కార్లు, ల్యాప్‌టాప్‌, టీవీని స్వాధీనం చేసుకున్నారు. ఏసీపీ సత్యానందం, టాస్క్‌ఫోర్స్‌ ఏసీపీ కె.మురళీధర్ విజ‌య‌వాడ పటమట పోలీస్‌స్టేషన్‌లో మంగళవారం వివరాలు వెల్లడించారు. గుడివాడ రామివారి వీధికి చెందిన మిరియాల వెంకట నాగ ఈశ్వరరావు ఎనికేపాడులోని మహితా నివాస్‌ అపార్టుమెంట్‌లో ఒక ఫ్లాట్‌ను అద్దెకు తీసుకున్నాడు. గుడివాడకు చెందిన గోగం సురేష్‌, పుట్టి రాజులను ఫ్లాట్‌లో ఉంచి ఇక్కడి నుంచి క్రికెట్‌ బెట్టింగ్‌లు కాసేవాడు. ఈశ్వరరావు ముంబయిలో ఒక బుకీతో పరిచయం ఏర్పర్చుకున్నాడు. అతనితో ఫోన్‌లో వివరాలు తెలుసుకుంటూ, దాని ప్రకారం పందేలు నిర్వహించేవాడు. దీనిపై సమాచారం అందడంతో టాస్క్‌పోర్సు పోలీసులు నిఘా ఉంచి, పక్కా సమాచారంతో ఫ్లాట్‌లో తనిఖీలు నిర్వహించారు. పందేలు కాస్తున్న నిర్వాహకుడు నాగ ఈశ్వరరావు, గోగం సురేష్‌, పుట్టి రాజును అదుపులోకి తీసుకున్నారు. వారి వద్ద నుంచి పదమూడు సెల్‌ఫోన్లు, స్విఫ్ట్‌ డిజైర్‌, రెనాల్ట్‌ డస్టర్‌ కార్లు, ల్యాప్‌టాప్‌, ఎల్‌ఈడీ టీవీని స్వాధీనం చేసుకొని పటమట పోలీసులకు అప్పగించారు. పోలీసులు వారిని విచారించగా, బెట్టింగ్‌కు పాల్పడుతున్న మరో నలుగురి సమాచారాన్ని ఇచ్చారు. దాని ప్రకారం విజయవాడ దేవీనగర్‌కు చెందిన వేగిరెడ్డి శ్రీనివాసరావు, పెనమలూరుకు చెందిన వెలగా అజయ్‌భాస్కర్‌, మైనేని దుర్గాప్రసాద్‌, పెడన మండలం కొంతెపూడికి చెందిన లుక్కా వీర రాఘవులును అరెస్టు చేశారు. ముంబయిలోని వ్యక్తితో వీరికి ఉన్న సంబంధాలపై పోలీసులు వివరాలు సేకరిస్తున్నారు.