అత్యంత హుషారుగా పోలీసుల క్రికెట్ పోటీలు

మచిలీపట్నం వేదికగా జరుగుతున్న పోలీసుల సబ్‌డివిజనల్‌ క్రికెట్‌ పోటీలు ఉత్సాహంగా సాగుతున్నాయి. పోలీసుంతా ప్రొఫెషనల్‌ క్రీడాకారుల మాదిరిగా తలపడుతుండటంతో మ్యాచ్‌లన్నీ ఆసక్తికరంగా సాగుతున్నాయి. పోటీల్లో అవనిగడ్డ, బందరు, బందరు ఏఆర్‌, నందిగామ, గుడివాడ, నూజివీడు జట్లు తలపడుతున్నాయి. శుక్రవారం నాటి పోటీల్లో మొత్తం మూడు మ్యాచ్‌లను నిర్వహించారు. బందరు జట్టు గుడివాడ జట్టుతో మొదటి మ్యాచ్‌లో తలపడింది. మొదట బ్యాటింగ్‌ చేసిన గుడివాడ జట్టు నిర్ణీత 20 ఓవర్లలో 5 వికెట్ల నష్టానికి 155 పరుగులు చేసింది. 156 పరుగులు విజయలక్ష్యంతో బరిలోకి దిగిన బందరు జట్టు 19.3 ఓవర్లలో 6 వికెట్ల నష్టానికి 156 పరుగులు చేసి విజయం సాధించింది. రెండో మ్యాచ్‌లో నూజివీడు, గుడివాడ జట్లు పోటీపడ్డాయి. తొలుత బ్యాటింగ్‌ చేసిన నూజివీడు నిర్ణీత 16 ఓవర్లలో 7 వికెట్ల నష్టానికి 101 పరుగులు సాధించింది. 102 పరుగుల విజయలక్ష్యంతో ఇన్నింగ్స్‌ను ప్రారంభించిన గుడివాడ 16 ఓవర్లలో 5 వికెట్ల నష్టానికి లక్ష్యాన్ని ఛేదించింది. మూడో మ్యాచ్‌లో బందరు ఏఆర్‌, అవనిగడ్డ జట్లు తలపడ్డాయి. ముందుగా బ్యాటింగ్‌ చేసిన అవనిగడ్డ 16 ఓవర్లలో 8 వికెట్ల నష్టానికి 98 పరుగులు చేసింది. అనంతరం 99 పరుగుల లక్ష్యంతో బ్యాటింగ్‌ను ప్రారంభించిన బందరు ఏఆర్‌ జట్టు 13.2 ఓవర్లలో 72 పరుగులకు ఆలౌట్‌ అయ్యి 26 పరుగుల తేడాతో పరాజయం పాలైంది. అవనిగడ్డ, బందరు డీఎస్పీలు ఖాదర్‌బాషా, సూర్యశ్రావణ్‌కుమార్‌లు పోటీలను తిలకించి క్రీడాకారులను పరిచయం చేసుకున్నారు.